Námskrá

	Texti
	Val Valkerfi byggir á þeirri hugmynd að barn læri af eigin áhugahvöt, því er börnunum gefið val um leiksvæði eða starf, svo þau hafi kost á að víkka þessa innri áhugahvöt sín. Valið er ramminn utan um frjálsa leikinn. Í vali gefst barni kostur á að efla sjálfstæði sitt og sjálfstraust með því að læra að taka ákvörðun og standa við hana. Í Hlíðabóli er val 3x í viku. Valsvæðin eru 5 í ár og hvert um sig hugsað sem rammi utan um ákveðið leikform. Rauða-herbergið er listsköpunarsvæði, þar geta verið 6 börn við margskonar listsköpun. Gula – herbergið er hentugast fyrir hlutverkaleikinn, þar sem börnin sjálf eru í aðalhlutverki. Skólinn á töluvert af búningum sem vinsælt er að nota, gólfpláss er mikið og hægt að vera með alls kyns leikefni í boði. 8 börn geta valið í gula hverju sinni. Appelsínugula- herbergið er ekki eiginlegt herbergi heldur leikloftið í gula og er búið að útbúa þar tölvuver. Nýlega var fjárfest í tveimur nýjum tölvum sem eru staðsettar á loftinu, 4 börn geta valið tölvuvinnu, leikskólinn hefur verið að viða að sér tölvuleikjum sem starfsmenn telja henta leikskólabörnum. Bláa-herbergið er ætlað fyrir hreyfingu, einingakubba og annað plássfrekt leikefni. Þar eru engin húsgögn, en rimlar, krókar fyrir rólur, leiktjöld og fjölbreyttur búnaður til hreyfileikja. 8 börn geta valið í bláa. Græna-herbergið er hugsað fyrir fínhreyfingu, þar er boðið upp á spil, púsl, kubba, perlur o.þ.h. þar er einnig leikloft en þar fer fram hlutverkaleikur. Í græna geta valið 10 börn hverju sinni. Í upphafi valstundar safnast öll börn á aldrinum 3 – 6 ára saman í holinu. Stór motta er sett á gólfið og þar sitja börnin. Valstjóri stýrir stundinni og byrjar á því að kynna hvaða svæði eru í boði. Hann er með myndir af börnunum sem raðað er í ákv. röð til að gæta þess að ekki sé alltaf sá sami sem byrjar að velja. Í valinu er notuð T.M.T tákn sem hvert og eitt barn fær í upphafi skólagöngu. Er þessi háttur hafður á til að reyna að halda aftur af hávaða sem oft myndast þegar margir eru saman komnir á einum stað, einnig er þetta liður í að tapa ekki niður leikninni í að nota táknin. Þegar barnið sér táknið sitt stendur það upp fær myndina sína í hendur og velur sér svæði. Val er tvisvar á dag og getur barnið valið sitt hvort svæðið ef það vill, en starfsmenn eru alla vikuna á sama svæðinu og hafa yfirumsjón með því svæði þessa þrjá daga sem boðið er upp á val.
	Hópastarf Hópastarf er mikilvægur þáttur í leikskólastarfi. Í hópastarfi öðlast barn skilning á gildi samvinnu og þroskar með sér samkennd og ábyrgðartilfinningu. Heilbrigt hópastarf örvar þroska einstaklings, þroski einstaklings auðgar starf hópsins. Hópastarf er tvisvar í viku, þá eru öll börnin í aldursskiptum hópum með sínum hópstjóra. Hópaskiptingin er þvert á deildir en allt starf yngstu og elstu barnanna fer fram í yngstu- og elstubarnastarfi. Hópastarfið hefur þrjú meginviðfangsefni. 1. listsköpun og föndur sem fram fer í rauða-og bleika herberginu. 2. tjáning og framsögn fer fram í gula herberginu. 3. leikir og hreyfing fer fram í bláa herberginu. Í hópastarfinu er verið að sinna einstaklingnum sem best um leið og hann lærir að leika og starfa í föstum hóp sem verður samhentur og kynnist vel innbyrðis.

Hlíðaból - Leikskóli Hvítasunnukirkjunnar á Akureyri
Skarðshlíð 20 603 Akureyri - sími: 462-7411 - tölvupóstfang: hlidabol hja hlidabol.is